ՀՀ ՔՏՀԱ տեսչական մարմնի միջնորդության հիման վրա կասեցվել է «Կանժիլստրոյ» ՍՊ ընկերության քաղաքաշինական գործունեություն իրականացնելու լիցենզիան

ՀՀ քաղաքաշինության տեխնիկական և հրդեհային անվտանգության տեսչական մարմնի ղեկավարի հանձնարարագրի հիման վրա Տեսչական մարմնի մասնագետները ստուգում են իրականացրել ՀՀ Վայոց Ձորի Արենի համայնքի Չիվա գյուղի 5-րդ փողոց, 9 շենք հասցեում գտնվող միջնակարգ դպրոցի տիպային (մոդուլային) շենքի կառուցման շինարարական աշխատանքների նկատմամբ։
Ստուգման արդյունքում պարզվել է, որ շինարարական աշխատանքների ընթացքում խախտվել են շինարարական նորմերի բազմաթիվ պահանջներ, որն  առաջացրել է շինության որակի  հետ կապված էական խնդիրներ։
Ստուգման արդյունքների հիման վրա Տեսչական մարմնի ղեկավարի որոշմամբ «Կանժիլստրոյ» ՍՊ ընկերությունը՝ «Քաղաքաշինության բնագավառում իրավախախտումների համար պատասխանատվության մասին»  օրենքի 12-րդ հոդվածի 2-րդ մասով ենթարկվել է վարչական պատասխանատվության։
Բացի այդ, հիմք ընդունելով արձանագրված խախտումները և ղեկավարվելով «Քաղաքաշինության բնագավառում իրավախախտումների համար պատասխանատվության մասին» օրենքի 19-րդ հոդվածով՝ Տեսչական մարմնի ղեկավարի կողմից մրջնորդություն է ներկայացվել  ՀՀ քաղաքաշինության կոմիտեի նախագահին՝  «Կանժիլստրոյ» ՍՊ ընկերության քաղաքաշինական գործունեություն իրականացնելու լիցենզիայի կասեցման հարցը  քննարկելու վերաբերյալ։

ՀՀ ՔՏՀԱ տեսչական մարմնի միջնորդության և լիցենզավորող հանձնաժողովի որոշման արդյունքների հիման վրա 2024 թվականի դեկտեմբերի 6-ին ՀՀ քաղաքաշինության կոմիտեի նախագահի  հրամանով կասացվել է «Կանժիլստրոյ» ՍՊ ընկերության՝ քաղաքաշինության բնագավառում տրամադրված շինարարության իրականացման լիցենզիայի գործողությունը։ 
Կասեցման ժամկետ է սահմանվել մինչև խախտման պատճառների վերացումը։