ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՇԻՆՈՒԹՅԱՆ, ՏԵԽՆԻԿԱԿԱՆ ԵՎ
ՀՐԴԵՀԱՅԻՆ ԱՆՎՏԱՆԳՈՒԹՅԱՆ ՏԵՍՉԱԿԱՆ ՄԱՐՄԻՆ
ՀՐԴԵՀԱՅԻՆ ԱՆՎՏԱՆԳՈՒԹՅԱՆ ՏԵՍՉԱԿԱՆ ՄԱՐՄԻՆ
ՀՀ քաղաքաշինության, տեխնիկական և հրդեհային անվտանգության տեսչական մարմնի ղեկավար Գարեգին Խաչատրյանի գլխավորությամբ տեղի ունեցավ աշխատանքային հերթական խորհրդակցությունը, որին մասնակցում էին Տեսչական մարմնի ղեկավարի տեղակալներ Սուրեն Մինասյանը և Արազ Պապիկյանը, ինչպես նաև ՏՄ կառուցվածքային և տարածքային ստորաբաժանումների ղեկավարները:
Խորհրդակցության ընթացքում քննարկվեց Տեսչական մարմնի ղեկավարի կողմից տրված հանձնարարականների կատարման առնչությամբ ընթացիկ հարցեր, ներկայացվեց վերահսկողության ոլորտներում իրականացված ստուգումների, հետազոտությունների և վերահսկողական այլ գործառույթների արդյունքները:
ՏՄ ղեկավարին զեկուցվեց ՀՀ ողջ տարածքում Տեսչական մարմնի կողմից գործունեությունը դադարեցրած գազա-բենզալցակայանների, ինչպես նաև նավթի և նավթամթերքի պահեստներում հրդեհային անվտանգության նորմատիվ պահանջների պահպանման նկատմամբ իրականացված վերահսկողության արդյունքները: Միաժամանակ, ՏՄ ղեկավարի կողմից կառուցվածքային և տարածքային ստորաբաժանումների պատասխանատուներին տրվեց հանձնարարական՝ նախկինում տրված կարգադրագրերով սահմանված ժամկետների ավարտից հետո նշված օբյեկտներում անցկացնել կրկնակի վերստուգումներ, և բոլոր այն դեպքերում, երբ կպարզվի, որ տնտեսավարողները չեն կատարել Տեսչական մարմնի կողմից կայացված որոշման պահանջները, նրանց նկատմամբ կիրառել խիստ պատասխանատվության միջոցներ:
Առանձին անդրադարձ կատարվեց նաև միջպետական և հանրապետական նշանակության ավտոճանապարհներին՝ համայնքային և պետական նշանակության հողամասերի վրա կառուցված ինքնակամ կառույցների նկատմամբ լայնածավալ վերահսկողական գործառույթների իրականացման հարցին, ինչպես նաև տեղական ինքնակառավարման մարմինների հետ համագործակցության արդյունավետության բարձրացման հնարավորություններին:
Ղեկավարի տեղակալ Սուրեն Մինասյանը ներկայացրեց Տեսչական մարմնի մասնագետների կողմից պետական և սուբվենցիոն ծրագրերով տարբեր համայնքներում ընթացող շինարարական աշխատանքների որակի վերահսկողության գործընթացը, արձանագրված խախտումները և առկա խնդիրները: Տրվեց հանձնարարական՝ ապահովել նման ծրագրերի նկատմամբ վերահսկողության պարբերականություն և շարունակականություն՝ կանխելու հնարավոր խախտումները և բարձրացնելու շինարարական աշխատանքների որակը:
Օրակարգում ներառված մյուս կարևոր հարցերը վերաբերում էին տեխզննման կայաններում իրականացվող վերահսկողության շարունակականությանը, բնական կամ հեղուկացված նավթային գազով աշխատող ավտոտրանսպորտային միջոցներում տեղադրվող գազաբալոնների վկայագրման գործընթացի նկատմամբ վերահսկողությանը, կանոնավոր և ոչ կանոնավոր ուղևորափոխադրումների նկատմամբ վերահսկողությանը և արձանագրված խնդիրներին ու արդյունքներին:
Աշխատանքային խորհրդակցության ավարտին Տեսչական մարմնի ղեկավար Գարեգին Խաչատրյանը տվեց մի շարք նոր հանձնարարականներ՝ վերահսկողական մեխանիզմների առավել արդյունավետ գործարկման և տեսչական գործառույթների խստացման ուղղությամբ:
